Қостанай облысында алты жылдан бері жөнделмей тұрған балалар ауруханасының тағдырына алаңдаған «Жаңа адамдар» қозғалысының белсенділері әділет үшін күресін жалғастыруда. «Халық Қаһары» азаматтық науқанының аясында олар өңірге қайта оралып, миллиондаған қаражаттың желге ұшпауы тиіс екенін және бұл мәселенің назардан тыс қалмауын талап етті.
Аталған күрделі мәселенің түп-төркіні 2019 жылы басталған. Сол жылы облыстық балалар ауруханасы жөндеуге жабылып, бастапқыда 1,2 миллиард теңге бөлінген. Кейін бұл сома 2,7 миллиард теңгеге дейін жетті. Алайда арада алты жыл өтсе де, аурухана әлі күнге дейін ашылмаған. Бұл жағдай ата-аналарды басқа аймақтардан көмек іздеуге мәжбүрлеп отыр.
Жөндеу жұмыстарына жауапты тұлға ретінде бастапқы күннен-ақ облыстық денсаулық сақтау басқармасының басшысы Данияр Джандаев аталды. 2023 жылы «Халық Қаһары» белсенділері оған халықтың «қара таңбасын» тапсырып, әрекетсіздігін сынға алды. Сол кезде шенеунік өз кінәсін мойындамай, әлеуметтік желілерде дау туғызған болатын.
Бүгінде белсенділер басқарма ғимаратының алдына биіктігі үш метр болатын «Халық Қаһары» стеласын орнатып, «Аурухана қайда?» деген жазу орналастырған.
Азаматтық науқанның жетекшісі Алихан Сарсенов былай дейді:
«Біз – жылы кабинеттерде отырып, халықтың үнін естімейтіндерге қарсы сөйлеп отырмыз. Бұл стела – халықтың ашу-ызасының белгісі. Біз Қостанай облысының денсаулық сақтау басқармасына нақты талап қойып отырмыз. Балалар ауруханасы – қоғам алдындағы аманат. Ол қаңырап бос тұрмауы тиіс, шын мәнінде жұмыс істеуі керек. Біз бұл мекеменің тұрғындарға қайтадан қызмет көрсетуін талап етеміз».
Қоғам белсенділері бұл күресті тоқтатпақ емес. Олар аурухана мәселесінің жабулы қазан күйінде қалмауын, жауапты органдар нақты шешім қабылдауын көздеп отыр. «Халық Қаһары» азаматтық науқанының өкілдері бұл істі соңына дейін жеткізуге бекінген.
